Søga
Á vári í 1985 vildu nakrir havnardreingir rógva kapp. Teir keyptu eitt áttamannafar og kallaðu tað Knørr, tí tað var eitt vakurt navn.
Bert ein hevði róð fyrr, men teir vóru ágrýtnir og fingu skopuningin og skilamannin, Hans Joensen, Hvíta Hans, at leggja lag á. Tá ið árið var úti, vóru teir føroyameistarar.
Soleiðis byrjar søgan um Róðrarfelagið Knørr.
Gamli bátur hýkur nú á Tjóðsavninum, men eftir hann er so mangt. Spennandi løtur og góðar stundir á mangan hátt.
Og har er felagið, har børn, ung og tilkomin enn gleðast við bát og sjógv.
Róðrarfelagið Knørrur er vælvera á føroyskum
Orka gjøgnum venjing
Gleði gjøgnum manning
Nærvera gjøgnum náttúru
Neystini og Tollbúðin
Róðrarfelagið Knørrur heldur til í Evensens pakkhúsi við Eystaru vág, í gamla neysti á Skálatrøð og í Tollbúðini á Eystaru bryggju.
Í Evensens og gamla neysti eru bátarnir. Har eru vit á vári og sumri. Í Tollbúðini eru maskinurnar og vektirnar. Har eru vit á heysti og vetri.