Formaðurin í Róðrarfelagnum Knørri til reseptión á Dannebrog

Formaðurin í Róðrarfelagnum Knørri, Sámal Kristiansson, dugir ikki bara at rokast í einum kappróðrarbáti. 25. august 2018 var hann eisini til reseptión saman við fínum selskapi á kongsskipinum Dannebrog.

Tað var hann, tí felag okkara tann 23. august var vertur fyri vitjan hjá Fríðriki krúnprinsi í neysti okkara í Evensens pakkhúsi. Vitjanin í neystinum eydnaðist væl, og tað eiga allir rógvarar og fyriskiparar felagsins sín stóra lut í og tøkk fyri.

Les um vitjanina hjá krúnprinsinum her.

Sí fleiri myndir frá reseptiónina niðanfyri.

Posted in tíðindi | Leave a comment
  •  
     
     
     

Tá ið Fríðrikur krúnprinsur vitjaði Róðrarfelagið Knørr

Í sambandi við almennu vitjanina hjá Fríðriki krúnprinsi og húski hansara í Føroyum, vitjaði krúnprinsurin Róðrarfelagið Knørr í Havn ávegis út í Tinganes.

Kappróðrarbátar høvdu tikið ímóti kongsskipinum, og uttan fyri neystið heilsaði formaður felagsins, Sámal Kristiansson, krúnprinsahjúnunum vælkomnum.

Í neystinum greiddi Heini Hátún hugfarsliga frá um føroyskan kappróður, og Eva Højgaard Lisberg handaði krúnprinsinum borðabát sum gávu frá Róðrarfelagnum Knørri. Alfred Gullbein hevur smíðað.

Krúnprinsahjúnini vóru ógvuliga fyrikomandi. Tey vóru sera áhugað í at hoyra meira um kappróður og góvu sær góðar stundir at práta um føroyska róðrarmentan. Danir eru stinnir í kappróðri sjálvir, og krúnprinsurin er ítróttamaður, so tað fall honum lætt.

Krúnprinsahjúnini hildu so leiðina víðari út í Tinganes, har løgmaður var vertur fyri móttøku.

Saman við borðabátinum, sum latin varð krúnprinsinum, hevði Róðrarfelagið Knørrur latið gera prýðisrit, sum vit endurgeva niðanfyri.

- (Tekstur á prýðisriti) -

Í kjalarvørrinum á føroyska bátinum stigu vit fram sum tjóð

Gáva frá Róðrarfelagnum Knørri í Havn til tygara kongligu hátign, Fríðrik krúnprins, í sambandi við almenna vitjan krúnprinsins við húski í neysti felagsins í Havn tann 23. august 2018.

Tygara kongliga hátign, krúnprinsurin.

Henda borðabát, sm vit geva tær, hevur Alfred Gullbein telgt og laðað úr træi í 2017. Tað síðsta verkið av mongum, nú hann sum gamal abbi stingur knívin í lumman eftir langt og skapandi lív.

Alfred er føddur í 1933 á Oyrarbakka og uppvaksin í Nesvík. Fór í læru á snikkaravirkinum í Hornabø í Havn sum 14 ára gamal og arbeiddi har leingi. Fekk familju og stovnaði síðan egið virki niðriundir í húsunum undir Varða í Havn, ið brátt fyltust av frískligum viðaranga og melodium frá hamrum og røskum snikkarasveinum.

Um aldarskiftið bleiv hann sekstisjey og gavst við professionella snikkarayrkinum. Tá hevði hann sett hurðar og sprossavindeygu í allar Føroyar, tak nú varðveitingarverdu húsini úti á Reyni, í Tinganesi, Kirkjubø og Koltri.

Bátasmíðið hevur hann havt framíhjá, bæði brúksbátar og modellbátar og hevur eisini undirvíst í kvøldskúlanum í bátasmíði. Bátarnir fara nú sum fríir fuglar um havið og prýða skúlar og heimastovur sum vakrar klenodiir. Og men um ikki ein modellbátur hongur sum kirkjuskip í Ølsted kirkju uttan fyri Aarhus. Ein gáva frá tjørnuvíkingum, tá teir gjørdu eina kingoferð hagar. Soleiðis knýtast fínir træðrir millum mentanir okkara.

Hesin, sum givin er tygara kongligu hátign, er eitt seksmannafar við segli. Eitt umboð fyri aldargamalt føroyskt bátasmíð og ein ambassadørur fyri dagsins kappróður og teir bátar, sum forfedrar okkara søktu sjógvin við. Har vit halda á steypum, og har teir livdu og lótust til at matføða seg og síni og til at byggja land okkara, Føroyar.

Í kjalarvørrinum á føroyska bátinum stigu vit fram sum tjóð.

Harrin fylgi tygara kongligu hátign og húski tygara á lívsins leið,
Róðrarfelagið Knørrur í Havn

Síggj myndir frá vitjanini niðanfyri. Myndirnar tóku Rógvi Andrias Fossadal og Ólavur Frederiksen.

Les eisini: Formaðurin í Róðrarfelagnum Knørri til reseptión á Dannebrog

Posted in tíðindi | Leave a comment

Ólavsøkuróðurin 2018 bleiv ein frálíkur knørradagur

Tambar føroyameistari fyri fyrstu ferð. Ormurin Langi føroyameistari fyri fyrstu ferð. Jarnbardur old girls føroyameistari fyri 1000 ferð. Báðir jallarnir upp á FM-pallin. Tríggjar ólavsøkugull og tvær ólavsøkusilvur.

Til lukku, røsku manningar okkara. Vit eru sanniliga errin av tykkum.

Vit takka fyri góðan róður
og ynskja øllum eina góða ólavsøku

Posted in tíðindi | Leave a comment

Róðrarfelagið Knørrur nógv heiðursmerkir í Vági

Hóast mjørkin hevði hug til at spæla kappróðrinum eitt puss, royndist Jóansøkan í Vági væl hjá Róðrarfelagnum Knørri. Ormsmenn sigraðu aftur og vunnu gull, jalsdreingir og tambargentur vunnu silvur í sera tættari kapping, og jalskvinnur endurtóku bronsuna frá sundalagsstevnu. Barnamanningin við gentum helt eisini fast við sína støðu og leggur sær nøkur stig aftur at rúgvuni. Frálík úrslit.

Vit takka vágbingum og RSF fyri væl avgreidda stevnu.

Síggjast aftur í Vestmanna um 14 dagar.
.

Genturnar á Tambar og dreingirnir á Jallinum á jóansøku 2018.

Posted in jallurin, tambar, tíðindi | Leave a comment

Gull og tannagrísl – Eystanstevnan 2018

Eystanstevnan hjá Knørrafelagnum í Havn var ein miksturur av súrligum sitrónum og stoltum lumumbakaramellum.

Tað byrjaði heilt okey. Smágenturnar á Tambar avanseraðu aftur og eru nú komnar á eitt fimta pláss, og smádreingirnir á Píli endurvunnu sætta plássið frá Norðoyastevnu. Útmerkað.

Men so fingu vit ein smekk, tá ið genturnar á Tambar endaðu á fjórða plássi í sínum róðri, eftir at hava átt fyrsta og annað plássið á undanfarnu stevnum. Uttan at taka nakað frá røsku kappingarneytum okkara, so høvdu genturnar vissuliga ein ringan dag, og tær fara púra vist at vinna seg fram aftur á medaljuplássini aftur. Komið sterkt aftur, gentur!

Knørrafólk gingu ikki leingi rósuleys, tí longu í næsta róðri gjørdu dreingirnir á Jallinum bart og vunnu sín róður í flottum stíli. Sera væl róð, og ikki minni sera væl uppiborið hjá hesum røsku knørradreingjum, ið hava vant so dúgliga fyri at vera við í fremstu røð. Hjartaliga til lukku, dreingir. Ólukksáliga flott!

Vit gingu nú heilt elektrifiseraði á runavíkskai, men súrnaðu skjótt aftur um trýnini, tá ið kvinnurnar á Jallinum bara blivu nummar fýra, eftir at tær hava vunnið heiðursmerkir á bæði Norðoyastevnu og Sundalagstevnu. Og tey fimm sekundini til fremst bát tognaðu til fjúrtan. Tað er einki yvir at dylja, at tað hevur ikki gingið eftir vild hjá sigursvandu jalskvinnum okkara, men úrslitini fara vónandi at koma. Vit krossa fingrar!

Og so var tað, at vit blivu skrykt til himmals av tíggjumannafarsróðrinum, sum verður ein tann minniligasti í summar. Menninir á Orminum Langa, sum annars hava róð púra lýtaleyst í ár, forskrektu lívið av okkum øllum við einum heilt elendigum starti og ruku tað mesta av eini bátslongd aftur um hinar, men tað gjørdi ikki mun. Púra kaldir róðu teir seg fram á oddan aftur og struku av stað við sigrinum fyri triðju ferð á rað. Eitt bragd, so tað forsló og klirraði í rútunum heilt til Havnar. Takk fyri ein ótrúliga spennandi og flottan róður, tit ormsins garpar. Vit eru sanniliga errin av tykkum! Men gevið okkum ikki fleiri slíkar gysarar. Tað heldur vanligt fólk ikki til.

Soleiðis hilnaðist nú eystanstevnan hjá okkum knørrafólkum í Havn. Tað var, sum skaldið kvað:
“Stundum niðri við havsins botn, stundum uppi í ský.”

Vit gloyma ikki at takka runavíkingum fyri eina væl fyriskipaða Eystanstevnu. Í ár hava høvdu teir flutt málið eitt vet longur inn á fjørðin fyri at skapa betri samanhang millum upplivingarnar á bryggjuni og kappróðurin, og tað eydnaðist sera væl. Vit fingu eitt gott upplivilsi. Gott í tykkum har inni.

Síggjast á jóansøku,
vit øll í Knørrafelagnum í Havn

Jallurin og Ormurin Langi, stoltir gullvinnarar á Eystanstevnu 2018. Húkandi ytst til vinstru okkara ikki minni stolti formaður, Sámal Kristiansson.

Posted in tíðindi | Leave a comment

… men barnaróðurin kunnu vit skiftast um at taka uppá

Seinastu tvær stevnurnar hava vit í Knørrafelagnum í Havn samstarvað við kollfirðingar og runavíkingar um at taka barnaróðurin upp á video.

Vit hava sæð, at hetta hevur lítið upp á seg og er ein gongd leið, inntil tað eydnast at fáa KvF ella annan miðil upp í part.

Róðrarfeløgini kunnu skiftast um uppgávuna. RSF kann eisini áleggja stevnufyrireikarum hana fyri eina sømdarupphædd. Vit vinna øll við tað.

Tað er ikki neyðugt við teirri nógvu videoútgerðini. Ein iPhone er nóg mikið. Vit kunnu so menna hetta til okkurt betri og snildari, um vit vilja. Ella vit behalda tað einfalt.

Vit í Knørrafelagnum í Havn sløkkja kameraið fyri hesa ferð og senda við hesum stafettina og hugskotið víðari.

Posted in tíðindi | Leave a comment

Róðrarfelagið Knørrur nógv heiðursmerkir í Kollafirði

Sundalagsstevnan í Kollafirði royndist væl hjá Róðrarfelagnum Knørri. Ormsmenn sigraðu aftur og vunnu gull, jalsdreingir og tambargentur vunnu silvur í sera tættari kapping, og jalskvinnur endurtóku bronsuna frá norðoyastevnu. Barnamanningar okkara hildu eisini antin fast við sína støðu í mun til seinast ella gjørdu framstig. Frálík úrslit.

Vit takka kollfirðingum og RSF fyri væl avgreidda stevnu. Síggjast næstu ferð.

Posted in tíðindi | Leave a comment

Video: Barnaróður á sundalagsstevnu 2018

Á sundalagsstevnu tann 9. juni 2018 samstarvaðu KÍF og Róðrarfelagið Knørrur um at taka barnaróðurin upp á video.

Síggj barnaróðurin hjá gentum (YouTube)

Síggj barnaróðurin hjá dreingjum (YouTube)

Posted in tíðindi | Leave a comment

Ein góð norðoyastevna hjá Róðrarfelagnum Knørri

Fyrsta FM-stevnan er farin aftur um bak, og Róðrarfelagið Knørrur kom væl frá starti. Genturnar á Tambar og menninir á Orminum Langa vunnu gull, og dreingirnir og kvinnurnar á Jallinum vunnu bronsu í góðari kapping um fyrsta plássið. Við hesum vunnu allir bláir fm-bátar heiðursmerki.

Barnamanningarnar vóru eisini nøgdar við síni úrslit, hóast tað ikki bleiv til heiðursmerkir. Genturnar vóru við fyri fyrstu ferð, og hóast aftastar vóru tær væl nøgdar og glaðar at sleppa at royna stevnuspenningin, og dreingirnir endaðu mitt í feltinum og vóru eisini væl nøgdir við sítt avrik.

Vit takka fyriskiparum og kappingarneytum fyri eina fína stevnu. Síggjast næstu ferð.


Mynd: Rógvi Fossadal.

Posted in jallurin, ormurin langi, tambar | Tagged , , | Leave a comment

Millum tøkini: Vár Antoniussen

Nú stevnurnar av álvara standa fyri durum, hava rógvarar og róðursfólk úr at gera við síðstu fyrireikingunum. Tó, so hevur Vár Antoniussen givið sær stundir at svara upp á teir tíggju altavgerandi spurningarnar ímillum tøkini.

Vár hevur róð í trý ár og situr nú við róðrið á øðrum ári og vísir sínar dygdir.

Bátur: Tambar
Pláss í bátinum: Róðurskvinna

1. Hevur tú nakað ritual áðrenn stevnu?
Vit plaga altíð at fara heim til eina, har vit fáa lekkran morgunmat og gera okkum klárar til stevnuna.

2. Hvør er tín besta kappróðraruppliving?
Tað má nokk vera á fjarðastevnu í Skála í fjør, tá vit fyri fyrstu ferð fingu heiðursmerki. Fingu gott nokk gult kort, men tað var ein góð og stuttlig uppliving allíkavæl.

3. Tú hevur júst vunnið ólavsøkuróðurin við trimum bátslongdum, hvussu feirar tú?
Hevði sikkurt reist meg og skrála eitt hart JA! Og so hevði eg brúkt kvøldið upp á at feira gullið væl og virðiliga saman við manningini.

4. Hvør er tín yndisrættur?
Har er so nógvur góður matur, men ein góð fleskasteik við sós og eplum er nokk tað besta.

5. Hvørjum hyggur tú eftir á mótsetta kyninum?
Nú veit eg ikki heilt. Bara hann er fittur, so burdi tað gingið.

6. Ræsta súpan ella riv í ovnin?
Eri ikki sum øll hini, tí eg leggi ikki so nógv í riv og ræsta súpan.

7. Netflix ella biograf?
Dámi best at bara liggja heima og hyggja eftir Netflix, men um ein góður filmur verður vístur í biografinum, so er tað altíð hugnaligt at fara ein túr við vinkonunum.

8. Um tú var eitt djór, hvat hevði tú verið?
Ein ketta, tí mær dámar so væl at slappa av.

9. Hvat ger Róðrarfelagið Knørr til besta felag í Føroyum?
Samanhaldi er fantastiskt, og tað er tað, sum ger, at tað altíð er stuttligt at fara oman í neystið at venja og at vera ein partur av felagnum.

10. Hvat ørindi úr “Orminum langa” dámar tær best?
Ørindi 10:
“Einar skalt tú nevna meg,
væl kann boga spenna,
Tambar eitur mín menski bogi,
ørvar drívur at renna.”

Posted in tambar | Leave a comment